المهندس / صبرى الجوهرى , يعنى ايه انتخابات فى مصر
عايز تفهم نظام الإنتخاب في مجلس النواب الجاي؟؟ اقرا المقال ده .. هام للغاية .. وبعد ما تقرا وتفهم .. اعمل خير وانشره .. علشان كل الناس تعرف .
مجلس النواب الجاي (اسمه كده في الدستور .. مجلس النواب .. مش مجلس الشعب .. وطبعا مجلس الشورى اتلغى خلاص) .. مكون من 567 عضو متوزعين كالتالي ..
420 عضو ينتم انتخابهم فردي ..
120 عضو يتم انتخابهم بالقوائم ..
27 عضو يعينهم رئيس الجمهورية ..
أولا : الفردي ..
مصر تم تقسيمها الى 237 دايرة للفردي .. لإنتخاب ال 420 نائب .. فيه دواير هايتم فيها انتخاب عضو واحد .. ودواير يتم فيها انتخاب عضوين .. ودواير يتم فيها انتخاب 3 أعضاء .. حسب كثافة السكان في كل دايرة ..
مثال .. محافظة اسكندرية .. اتقسمت ل 14 دايرة لإنتخاب 25 نائب فردي .. والدواير هي ..
منتزة أول (3 نواب) .. منتزة ثان (2) .. رمل أول (2) .. رمل ثان (2) .. سيدي جابر (2) .. باب شرقي (2) .. محرم بك (2) .. مينا البصل (2) .. الدخيلة (2) .. العامرية (2) .. كرموز (1) .. العطارين (1) .. الجمرك (1) .. برج العرب (1) ..
وهكذا في كل محافظة بإختلاف عدد النواب الفردي من محافظة لأخرى حسب عدد السكان .. والفردي فردي .. مفيش حاجة اسمها واحد فئات وواحد عمال زي زمان ..
ثانيا : القوائم ..
مصر اتقسمت الى 4 دواير كبار لإنتخاب 120 نائب بالقائمة .. دايرتين منهم هايتم انتخاب 15 نائب لكل منها .. ودايرتين لإنتخاب 45 نائب لكل منها ..
45 + 45 + 15 + 15 = 120 نائب
الدائرة الأولى (45 نائب) .. وتشمل القاهرة والقليوبية والدقهلية والمنوفية والغربية وكفر الشيخ ..
يعني الحزب او التحالف هاينزل المحافظات دي كلها بنفس القائمة كدايرة واحدة .. مش الحزب او التحالف ينزل في كل محافظة منهم بقايمة .. والتصويت هايتم على نفس القائمة اللي فيها 45 اسم في كل المحافظات دي ..
الدائرة الثانية (45 نائب) .. وتشمل الجيزة والفيوم وبني سويف والمنيا وأسيوط والوادي الجديد وسوهاج وقنا والأقصر وأسوان والبحر الأحمر ..
الدائرة الثالثة (15 نائب) .. وتشمل الشرقية ودمياط وبورسعيد والإسماعيلية والسويس وشمال سيناء وجنوب سيناء ..
الدائرة الرابعة (15 نائب) .. وتشمل الإسكندرية والبحيرة ومطروح ..
طب القايمة بتتشكل ازاي؟؟ أقولكوا ..
أي حزب أو تحالف هاينزل قايمة يبقى لازم يكون عدد الأسماء اللي فيها مطابق لعدد نواب الدايرة .. يعني في الدايرة الأولى والتانية القايمة يبقى فيها 45 اسم .. والثالثة والرابعة القايمة يكون فيها 15 اسم ..
ماتقلقش من كتر الأسماء لإن حضرتك هاتعلم على اسم القايمة في الإستمارة .. مش هاتعلم على أسماء ..
يبقى ده أول شرط .. العدد الإجمالي .. الشرط التاني هو ان القايمة ال 15 لازم يكون فيها 7 سيدات .. أقل من كده لأ .. والقايمة ال 45 في الدايرتين الكبار يكون فيها 21 سيدة .. أقل من كده لأ .. ممكن أكتر ..
الشرط الثالث ان في كل قايمة لازم كل محافظة يبقى ليها عدد محدد من المرشحين حدده القانون .. يعني مثلا القايمة اللي هاتتنافس في الدايرة الرابعة .. ام 15 اسم .. لازم يكون منهم 7 من اسكندرية و 7 من البحيرة وواحد من مطروح .. قايمة الدايرة الأولى .. 45 اسم .. لازم منهم 14 من القاهرة و 7 قليوبية و 8 دقهلية و 5 منوفية و 7 غربية و 4 كفر الشيخ .. وهكذا ..
الشرط الرابع في القايمة انها لازم تحتوي على فئات محددة وبعدد محدد ..
1- مسيحيين ……….. 3 اعضاء في القايمة ال 15 .. و 9 في القايمة ال 45
2- عمال وفلاحين ….. 2 أعضاء في القايمة ال 15 .. و 6 في القايمة ال 45
3- شباب (تحت 35) .. 2 أعضاء في القايمة ال 15 .. و 6 في القايمة ال 45
4- مصريين بالخارج …. عضو في القايمة ال 15 .. و 3 في القايمة ال 45
5- احتياجات خاصة … عضو في القايمة ال 15 .. و 3 في القايمة ال 45
وباقي القائمة متنوع .. أي حاجة ..
يعني المواطن في اسكندرية مثلا هايستلم الإستمارة هايختار فيها اسم او اتنين او تلات مرشحين للفردي .. حسب دايرته .. وهايختار فيها اسم للقائمة أم 15 مقعد .. والقوايم اللي بيختار منها دي هي هي اللي معروضة لسكان البحيرة ومطروح .. لإنهم دايرة واحدة قوائم .. اما الفردي يختلف من دايرة لدايرة ..
واضحة كده؟؟ تمام جدا .. فاضل حاجة واحدة بس علشان الصورة تكتمل .. دلوقتي لو قايمتين بيتنافسوا في دايرة 15 مثلا .. وقايمة اخدت تلات ارباع الأصوات وقايمة أخدت الربع .. ال 15 مقعد هايتقسموا بينهم ازاي؟؟
الإجابة .. مش هايتقسموا .. القايمة الكسبانة هاتاخد كل المقاعد ال 15 .. أو ال 45 لو في الدايرتين الكبار .. ده نظام اسمه القائمة المطلقة .. المهم القائمة الكسبانة لازم تجيب لوحدها اكتر من نص عدد الأصوات .. ولو ماحصلتش بتحصل اعادة بين اعلى قايمتين من القوائم المرشحة ..
اصلهم لو اتقسموا ما بينهم .. واخدت اول 10 اسماء من الكسبانة مع اول 5 أسماء من الخسرانة مثلا .. كده الناس اللي اسماؤهم في آخر القائمتين طلعوا بره .. لو كل قايمة حطتلى الشباب في الآخر مثلا .. ممكن تلاقي مفيش شباب اصلا في البرلمان .. غير الخناقة اللي هاتحصل علشان الترتيب جوه القائمة ..
دلوقتي مفيش الكلام ده .. القائمة بتمثيلها النوعي لو جابت 50% من الأصوات + 1 تدخل كلها بشبابها وعمالها و معاقيها ومسيحييها .. لضمان تمثيل كل الناس دي وعدم وضعهم في ذيل القوائم بصورة شكلية زي ما حزب النور عمل مع الستات كده في انتخابات برلمان الإخوان وحطهم في الآخر علشان مايدخلوش ..
